Джума – бу Юдже Аллах тарафындан бир бахшыштыр. Пейгъамберимиз ﷺ деди: «Кунь догъгъан куньлернинъ энъ гузели – бу Джума..»
Джума куню ойле бир вакъыт аралыгъы бар, бу вакъытта Юдже Аллахкъа япылгъан ду’аларгъа джевап берилир.
Бир заман Пейгъамберимиз ﷺ деди:
«Бу куньде ойле бир саат бар, эгер къул Раббисине ду’а иле мураджаат этсе Юдже Аллах онынъ дуа’сыны мытлакъа къабул этер ве истегенини берер».
Бу сёзлерни айтаркен Пейгъамберимиз ﷺ бу вакъыт къыскъа заманда олгъаныны пармагъынен ишарет этти.
Бу мубарек вакъытта гюнах шейлерден гъайры Раббинъден не истесенъ, бу истегинъе джеваб алырсынъ. Арамызда ким мухтадж дегиль? Юдже Аллах истегенинъни бермесини ким истемез? Бойле инсанлар тапылмаз. Онынъ ичюн бизлерге бу фырсатны къачырмагъа олмаз. Пейгъамберимиз ﷺ бу вакъыт къыскъа олгъаныны бельгиледи ве биз бу фырсатнен къулланмакъ керекмиз.
Амма бу мубарек саат не вакъыт ола? Джуманынъ сабасы, яда ойлеси, яда акъшамы? Ислям алимлери бу меселе ичюн тюрлю фикирлер сеслендирелер, амма акъикъаткъа якъын олгъан, хадис ве делиллернен тасдыкълангъан эки фикир бар.
Биринджи вакъыт имамнынъ минбаргъа кётерилип джума хутбесини сеслендирмесинен башлана ве джума намазынен екюнлене. Амма айтмакъ керек ки, имам хутбени сеслендирген вакъытта джамиде отургъанлар сеслерини чыкъармадан бу хутбени динълемек кереклер.
Эгер джума хутбеси айтылгъан вакъыт лаф этмеге мумкюн олмаса, насыл ду’а япмалы? Имам эки хутбе арасында отура ве вакъыт аралыгъы бере. Бу вакъытны ду’а ичюн куълланмагъа мумкюн. Яда намаз окъулгъан вакъыт, седждеде олгъан заманда яда тешехуд окъулгъан заман. Бу заман Юдже Аллахтан истегенинъни сора, ондан зияде седждеде сенинъ ду’анъ къабул олмасына эки фактор бир ерге келе: биринджиден бу мубарек саат, экинджиден исе сен седждеде булунасынъ, сен Раббинъе энъ якъын ердесинъ. Зира Пейгъамберимиз ﷺ деди:
«Къул озь Раббисине энъ якъын олгъан ер – бу седждеде олгъан заманыдыр, онынъ ичюн Онъа чокъ ду’алар иле мураджаат этинъиз».
Экинджи вакъыт Экинди (Аср) намазы кельмесинен башлана ве кунь баткъанына къадар девам эте.
Пейгъамберимиз ﷺ деди: «Джума — 12 вакъыт девиринен ибареттир. Оларнынъ арасында ойле вакъыт бар ки, эгер мусульман бу вакъыт девамында Раббисинден бир шей истесе, Юдже Аллах онъа бу шейни мытлакъа береджек. Бу вакъытны экинди намазынынъ сонъки саатларында аранъыз».
Сайгъылы агъалар ве таталар! Бу вакъытта озь ду’аларынъызда исрарлы ве гъайретли олунъыз. Юдже Аллахкъа хайыр насип этмесини ве зулумдан къорчаламасыны истенъиз. Юдже Аллах ичюн имкянсыз бир шей ёкъ, Онынъ ичюн эр шей къолайдыр!
••❁⚜️❁••❀🔹❀••❁⚜️❁••❀🔹❀••❁⚜️❁••❀🔹❀••❁⚜️❁••❀🔹❀••❁⚜️❁••
Cuma künü du’a qabul etilgen vaqıt
Cuma – bu Yüce Allah tarafından bir bahşıştır. Peyğamberimiz ﷺ dedi: «Kün doğğan künlerniñ eñ güzeli – bu Cuma..»
Cuma künü öyle bir vaqıt aralığı bar, bu vaqıtta Yüce Allahqa yapılğan du’alarğa cevap berilir.
Bir zaman Peyğamberimiz ﷺ dedi:
«Bu künde öyle bir saat bar, eger qul Rabbisine du’a ile muracaat etse Yüce Allah onıñ dua’sını mıtlaqa qabul eter ve istegenini berer».
Bu sözlerni aytarken Peyğamberimiz ﷺ bu vaqıt qısqa zamanda olğanını parmağınen işaret etti.
Bu mubarek vaqıtta günah şeylerden ğayrı Rabbiñden ne isteseñ, bu istegiñe cevab alırsıñ. Aramızda kim muhtac degil? Yüce Allah istegeniñni bermesini kim istemez? Böyle insanlar tapılmaz. Onıñ içün bizlerge bu fırsatnı qaçırmağa olmaz. Peyğamberimiz ﷺ bu vaqıt qısqa olğanını belgiledi ve biz bu fırsatnen qullanmaq kerekmiz.
Amma bu mubarek saat ne vaqıt ola? Cumanıñ sabası, yada öylesi, yada aqşamı? İslâm alimleri bu mesele içün türlü fikirler seslendireler, amma aqiqatqa yaqın olğan, hadis ve delillernen tasdıqlanğan eki fikir bar.
Birinci vaqıt imamnıñ minbarğa köterilip cuma hutbesini seslendirmesinen başlana ve cuma namazınen yekünlene. Amma aytmaq kerek ki, imam hutbeni seslendirgen vaqıtta camide oturğanlar seslerini çıqarmadan bu hutbeni diñlemek kerekler.
Eger cuma hutbesi aytılğan vaqıt laf etmege mümkün olmasa, nasıl du’a yapmalı? İmam eki hutbe arasında otura ve vaqıt aralığı bere. Bu vaqıtnı du’a içün kullanmağa mümkün. Yada namaz oqulğan vaqıt, secdede olğan zamanda yada teşehud oqulğan zaman. Bu zaman Yüce Allahtan istegeniñni sora, ondan ziyade secdede seniñ du’añ qabul olmasına eki faktor bir yerge kele: birinciden bu mubarek saat, ekinciden ise sen secdede bulunasıñ, sen Rabbiñe eñ yaqın yerdesiñ.
Zira Peyğamberimiz ﷺ dedi:
«Qul öz Rabbisine eñ yaqın olğan yer – bu secdede olğan zamanıdır, onıñ içün Oña çoq du’alar ile muracaat etiñiz».
Ekinci vaqıt Ekindi (Asr) namazı kelmesinen başlana ve kün batqanına qadar devam ete.
Peyğamberimiz ﷺ dedi: «Cuma — 12 vaqıt devirinen ibarettir. Olarnıñ arasında öyle vaqıt bar ki, eger musulman bu vaqıt devamında Rabbisinden bir şey istese, Yüce Allah oña bu şeyni mıtlaqa berecek. Bu vaqıtnı ekindi namazınıñ soñki saatlarında arañız».
Sayğılı ağalar ve tatalar! Bu vaqıtta öz du’alarıñızda israrlı ve ğayretli oluñız. Yüce Allahqa hayır nasip etmesini ve zulumdan qorçalamasını isteñiz. Yüce Allah içün imkânsız bir şey yoq, Onıñ içün er şey qolaydır!
Тазе тефсирлер