بسم الله الرحمن الرحيم
Latin urufatında oqumaq
Эй Аллахын къулу! Рамазан айында, сенинъ огюньде эн онемли ве айретте къалдыраджакъ макъсад тура! Сенинъ огюньде онемли макъсад тура, ве бу макъсад сенинъ ичюн стимул олмакъ керек! Санъа беля олсун! Эй Аллахын къулу, шимди айтыладжакъ сёзлерге къулакъ асмасанъ, — санъа беля олсун, чюнки сенинъ ичюн джезагъа ве сенинъ ичюн белягъа, коклерде Аллахнынъ векили олгъан дуа япты (амину с-сама’)! Ер юзюнде векиль олгъаны исе, коктеки векильнинъ дуасына «Амин» деди. Мелеклернинъ эн гузели Джибриль (алейхи селям) бу насихатны динлемегенге белянен джезаламагъа Юдже Аллаха дуа этти. Джибриль, Юдже Аллаха бу дуанен мураджат эткен заманда ресуллернинъ ве эльчилернинъ эн гузели Мухаммед ﷺ «Амин» деди.
Рамазан – бу рахметтир, амма эркес ичюн дегильдир, эй Аллахын къуллары! Рамазан инсан ичюн рахмет себеби яда джеза себеби ола билир. Базы намаз къылгъан ве ораза туткъан кимселер ичюн бу ай джеза себеби ола билир, ве бу акъкъында Пейгъамберимиз ﷺ деди:
«Ойле олурки, ораза туткъан кимсеге онынъ оразасындан ачлыкътан гъайры бир шей къалмаз, ве ойле олурки о гедже намазларыны къылды, амма онынъ гедже намазларындан онъа тек юкъусызлыкъ къалыр».
Ибн Маджах (1690), Насаи «Сунан аль-Кубра» (3249), Шейх аль-Албани бу хадиске сахих деди «Сахих аль-Джами’ ас-сагъир» (3488) ве «Сахих ат-Таргъиб уа-т-тархиб» (1083).
Эй Аллахын къулу, бойле категория инсанлары ичинде олмакътан сакъын!
Онынъ ичюн, эй Аллахын къулу, мен санъа хабер этмеге меджбурым, тезден сен Рамазангъа киредженъ – озюнъ ичюн макъсад ве вазифелерни тайин эт. Бу айда сенинъ макъсадларынъ насыл?! Сенинъ шахсий вазифенъ (фард айн) – бу ораза тутмакътыр, амма бу сенинъ ильк вазифенъ дегиль. Бундан гъайры даан шахсий вазифенъ бар – бу айда Юдже Аллахтан багъышлав къазанмакъ. Эбет, бу ваджиптыр! Демекки, эгер сен бу айда багъышлав къазанмагъа арекет япмасанъ, сенинъ устюнъе гюнах оладжакъ! Алимлер дейлер, «Рамазан» келимеси «рамадъа» / къызмакъ фиилинден келе. Не ичюн онынъ манасы бойле? Чюнки Рамазан – бу ойле ай ки, инсан бу айгъа киреркен, онынъ гюнахлары бу ай девамында янмакъ керек. О озь гюнахларындан арынмакъ керек!
Бу Къуран айыдыр, эбет! Аллахнынъ Китабы сенинъ ичюн насыл рахмет олгъаны киби, ойледе джеза ола билир, чюнки Юдже Аллах (Субханаху ва Та’аля) Озь Китабында бойле буюра:
﴾وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِّلْمُؤْمِنِينَ وَلَا يَزِيدُ الظَّالِمِينَ إِلَّا خَسَارًا﴿
«Биз Къур’андан ойле бир шей эндирмектемиз ки, О му’минлер ичюн шифа ве рахметтир; залымларнынъ исе, ялынъыз зияныны арттырыр».
(«аль-Исра», 17:82).
Онынъ ичюн селефлер айта эдилер, бир кимсе Къуран окъумагъа отурып, асла акъибет алмадан турып оламаз. Мытлакъкъа онынъ артындан бир шей девам этер – яда сенинъ файданъа, яда сенинъ зарарынъа. Умер ибн аль-Хаттаб озь идаре эткен девиринде Меккеге кельди, Меккеде тайин эткен озь векилинен корюшти ве ондан сорады: «Сен дере сакинлерине вали оларакъ кимни тайын эттинъ?»
О деди: «Ибн Абзаны тайин эттим».
Умер сорады: «Ибн Абза кимдир?»
О деди: «Ибн Абза – бу азатлыкъ алгъан къуллардан бириси».
Умер сорады: «Эвельде къул олгъан кимсени тайин эттинъизми?»
Аджайип шей, бир кимсе тапылмады ве къулны тайин эттилер. О заман вали Умерге анълатты: «Чюнки Ибн Абза – арамызда Къуранны эн гузель биле».
О заман Умер ибн аль-Хаттаб деди: «Акъикъаттен Пейгъамберимиз ﷺ деди:
“Шубесиз бу Къуран себебинден Юдже Аллах (Субханаху ва Та’аля) миллетлерни юксельте ве бу Къуран себебинден миллетлерни ашшагъылата”».
Ахмад (1/35), Муслим (817) ве Ибн Маджах (218). Шейх аль-Албани бу хадиске сахих деди «Сахих аль-джами’ ас-сагъир» (1896).
Къуран себебинден юксельтильген миллетлер, — бу Къурангъа сым-сыкъ сарылгъан кимселердир; ашшагъылангъан миллетлер исе, — Къуранны ред эткен кимселердир.
Бу аетни тынъланъыз; пек аз кимсе онынъ манасыны анълай:
﴾لَقَدْ أَنزَلْنَا إِلَيْكُمْ كِتَابًا فِيهِ ذِكْرُكُمْ أَفَلَا تَعْقِلُون﴿َ
«Ант олсун, сизге ичинде сиз ичюн огют булунгъан бир китап эндирдик. Аля акъылланмазсынъызмы?»
(«аль-Энбийа», 21:10).
Бизим вазиетимиз ашшагъы оладжакъ яда Юдже Аллах (Субханаху ва Та’аля) бизлерге буюклик береджекми, насыл биз Къурангъа багълангъанымызнен багълы. Къуранда бизим фазилетимиз! Онынъ ичюн, не заман мусульманлар Къуран ве Суннетке сым-сыкъ сарылгъанларда, олардан эркес къоркъа эди ве оларны урьмет эте эдилер. Не заман исе мусульманлар Къуранны ве Суннетни сыртларыны артына ташладылар, о заман оларнен шимдики вазиет олып башлады – мусульманлар ашшаланма вазиетте олдылар. Онынъ ичюн бу ает эр заман бизим козьлеримизни огюнде олсун, оны эр заман хатырланъ:
﴾لَقَدْ أَنزَلْنَا إِلَيْكُمْ كِتَابًا فِيهِ ذِكْرُكُمْ أَفَلَا تَعْقِلُون﴿َ
«Ант олсун, сизге ичинде сиз ичюн огют булунгъан бир китап эндирдик. Аля акъылланмазсынъызмы?»
(«аль-Энбийа», 21:10).
Юдже Аллах (Субханаху ва Та’аля) бу Къуран себебинден миллетлерни юксельте ве бу къуран себебинден башкъа миллетлерни ашшалата. Рамазан айы инсанлар ичюн джеза себеби олып чевирильмеси мумкюн.
Шимди сен мектепке киресинъ. Бу ай девамында сен Рамазан мектебинде окъуйджанъ. Сен оны битирип имтиханларны бермек керексинъ. Насыл имтихан? Сен гюнахларынъа афу къазанмакъ керексинъ, бойледже сен имтиханны берген олурсынъ.
Еди сахабе! Еди! Пейгъамберимизни ﷺ еди сахабеси ривает эттилер:
«Бир заман Пейгъамберимиз ﷺ озь мимберине эр сефер котерильген киби дегиль шекильде котерильди. О биринджи басамакъкъа котерильди ве: “Аминь”, деди; сон исе экинджи басамакъкъа котерильди ве кенеде: «Аминь», деди; сон исе учюнджи басамакъкъа котерильди ве: «Аминь», деди».
Сон исе сахабелер сорадылар: «Эй Аллахнынъ Эльчиси, не ичюн учь кере «Аминь» дединъ».
О заман Пейгъамберимиз ﷺ анълатты: «Манъа Джибриль кельди ве о деди: “Эй Мухаммед, сенинъ адынъ анъылгъанда, сенинъ ичюн Аллахтан салят сорамагъан (яни Аллахнынъ салят ве селямлары онъа олсун/ салля Ллаху ‘алейхи уа саллям) кимсе, ашшагъы вазиетте къалсын (башкъа риваетте айтыла: «Дженнеттен ве рахметтен узакъ олсун»)”. Мухаммед: «Аминь айт», деди, ве мен «Аминь» дедим. Сон исе мен экинджи басамакъкъа котерильгенимде, Джибриль деди: “Эй Мухаммед, ана-бабасына, яда экисинден бирисине раст келип, олар онынъ Дженнетке кирмесине себеб олмагъан кимсени (Дженнетке кирмек ичюн оларгъа гузель давранмады)вазиети ашшагъы олсун”. О деди: «Мухаммед “Аминь” айт», ве мен «Аминь» дедим. Сон Джибриль деди: “Рамазан айына яшап еткен, ве багъышлав къазанып оламагъан кимсени вазиети ашшагъы олсун”. “Аминь” айт, ве мен «Аминь» дедим».
Табарани «Му’джам аль-Кабир» (2022), ибн Хузайма (1888), ибн Хиббан (2378). Шейх аль-Албани бу хадиске сахих деди «Сахих аль-джами’ ас-сагъир» (75) ве «Сахих ат-таргъиб уа-т-тархиб» (1678—1679).
Джибриль бойле дуа япты! О, Рамазан айында афу къазанмагъан кимсе ичюн – къолундан кельгенини япмагъаны ичюн, джеза ве ашшалама сорады.
Онынъ ичюнъ, эй Аллахын къулу, сенинъ эн онемли вазифенъ — бу Рамазаннынъ башында озь макъсадларынъны тайын этмектир. Я сенинъ макъсадынъ насыл? Юдже Алахтан афу къазанмакъ. Бу сенинъ оразанъны макъсадыдыр!
Бакъ, сенинъ душманынъ зынджырларгъа бугъавланаджакъ. Эн хишимли джин ве шейтанлар зынджырларгъа бугъавланаджакътыр. Бойледже, олар эр заман япкъаныны япып оламайджакълар; эр вакъыт киби санъа весвесе япып, гюнахкъа давет этип оламайджакълар. Сен бу душмандан сербест оладжанъ, Аллаха хамд олсун!
Санъа эр гедже деллял давет этип мураджат этеджек, ве сени тешвикъ этеркен айтаджакъ:
«Эй хайыр истеген, арекет эт! Эй гюнах япмагъа истеген, озюнъни тут!»
Тирмизи (682), ибн Маджах (1642), Хаким (1/421). Бу хадис сахих олгъаныны шейх аль-Альбани тасдыкълады.
Юдже Аллах (Субханаху ва Та’аля) санъа бутюн шараитлер азырлады – сенинъ фикирлеринъ Юдже Аллаха ибадет этмек ичюн темизленмесине О сени аштан, сувдан, джинсий якъынлыкътан махрум къалдырды. Не заман инсан токъ олгъан сон, о гюнах япмагъа тырыша. Аллах сени джинсиет хошлукълардан махрум къалдыра. Сенинъ гедженъни Юдже Аллах (Субханаху ва Та’аля) ненен мешгъуль этти? Аллах севген амеллернен – гедже намазларында турмакънен. Бойледже, Юдже Аллах (Субханаху ва Та’аля) сенинъ ичюн айры тербие программасы азырлады, бутюн сенинъ бош вакъытынъны хайырнен толдурды, о мектепни битирген сон, озь душманынънен саваш япмакъ ичюн. Чюнки бу душман юкъламай – шейтан юкъламай. Хасан аль-Басри айткъаны киби: «О юкъласа эди, бизде раатланыр эдик».
«Тальбису Иблис», 49 с.
Бу душманнынъ эн онемли макъсады не! О сени Дженнеттен махрум къалдырмагъа истей, о сенинъ Раббинъни багъчаларыны тутып алмагъа истей. Бу душманнен саваш, бинъ йыллар девам эте. Бу саваш бизим Адем (алейхи селям) атамыз девиринден девам эте. Арбий адамлар билелер, не къадар чокъ саваш узая, о къадар чокъ онъа сабыр керек. Ондан гъайры, не къадар саваш этильген мал эмиетли шей исе (бу Дженнет), о къадар бу саваш къийметлидир. Ве не къадар душманны айнеджилик япмагъа, апансызлыкъ япмагъа истидаты бар исе, о къадар бизден ачыкъкозлик талап этиле. Онынъ ичюн, эй меним къардашларым, бу шимди биз киреджек мектеп, бизлерден фааликни ве арекетликини талап эте. Кундюз бизден озь нефсимизнинъ арзуларындан ред этмек талап этиле, гедже исе Юдже Аллах (Субханаху ва Та’аля) бизлерни намазларнен мешгъуль этти.
Онынъ ичюн бу фырсаткъа, бу имкяниетке джиддий бакъынъыз. Йылда бир ай! Тек бир ай йылда – йигирми докъуз яда отуз кунь. Оны бошуна масраф этме! Сени Къурандан, Аллахны анъмакътан, истигъфар япмакътан, дуа ве намазлар къылмакътан чеккен шейлерни четке къой. Гаджетлерни, интернет ве хабер сайтларыны, кино ве оюнларны четке чек – олардан бир айгъа вазгеч! Сен он эки айдан бир айда буны япмагъа чаренъ бармы? Бу оюнлар, гаджет ве интернетлер санъа Махшер куню асла ярдым этип оламазлар. Сен чиплакъ тураджанъ! Чиплакъ, ялынаякъ ве суннет этильмеген!
Озюнъни тесавур эт. Башкъа инсанларны дегиль, озюнъни! Шимди сени чиплакъ мейдангъа чыкъараджакъларыны тесавур эт. Сен озюнъни насыл беджериксиз дуяджакъсынъ? О куню, сен чиплакъ ве суннет этильмеген вазиетте, санъа ошагъан инсанларнен эн буюк Макемеге кетеджексинъ – эсапкъа кетеджексинъ! Ана о заман сен, къачыргъан ве бошуна кечирген эр бир саниенъ ичюн ве эр бир нефесинъ ичюн пешман этеджексинъ.
Он бир айны сен насыл кечирдинъ, оны Юдже Аллах (Субханаху ва Та’аля) биле… Къач кере акъикъаттен Къуран окъудынъ?! Къач кере сен Аллахнынъ Китабыны къолунъа алып, чин оректен оны окъудынъ? Къач кере сен Аллахтан афу сорап агъладынъ?! Не къадар табий намазлар сен къылдынъ?! Сагъгъа ве солгъа фикиринъ учып кетмеген намазлар, кальптен олгъан намазлар? Къач кере сен ихляслы оларакъ Юдже Аллаха геджелерде дуа яптынъ? Эн азында, энди козюнъни ач! Козюнъни ач! Сенинъ Раббинъни деллялы санъа коктен мураджат эте – сен оны эшитмейсинъ, амма о санъа дей: «Эй хайыр истеген, онъа арекет эт! Эй зулюм истеген. Ондан ваз геч!»
Чокъ инсанлар исе яшайыш къиймылдысына, мал-мульк артындан чапмагъа баттылар. Ойле ола ки. Инсан Рамазан айына кире, амма бу ай кельгенини даан анълап оламай. О санким паравоз киби бу дуньянынъ ишлери, къазанмакъ, хаят ве истеклернен сарылмакъ, бу дуньяны малыны арзу этмек чытасында ель киби уча. Чапа, чапа, сон исе озюне келе, ве анълай энди Рамазаннынъ ярысы кечти! Ойле ола ки, инсан Рамазаннынъ биринджи ярысында эпчиль ола, амма уяна таба о заифлеше, ве Рамазаннынъ ортасына о ибадетлеринде солукъ ола.
Эй Аллахын къулу, бу саювлы куньлер! Юдже Аллах (Субханаху ва Та’аля) дей:
«Сайылы куньлерде олмакъ узьре».
(«аль-Бакъара», 2:184).
Онынъ эр бир кунюне биринджи саниесинден башлап пек къийметлидир! Сен эсинъни топлагъанынъа къадар Рамазаннен энди ведалашаджакълар. Бельким да. Бу сенинъ сонки Рамазанынъдыр. Бельким айни бу амеллернен сен Юдже Раббинъе къавушаджанъ. Бельким олюм мелеги сени айни бу Рамазандан сон аладжакъ. Онынъ ичюн эр дакъкъанъда бакъ, сени насыл вазиетте Юдже Аллах ала билир.
Онынъ ичюн Пейгъамберимиз ﷺ бойлер сёзлер айтты:
«Эгер Юдже Аллах инсан ичюн хайыр истесе оны абаданлаштыра».
Инсанлар сорадылар: «Абаданлаштырмакъ, бу не демек?»
Пейгъамберимиз ﷺ бойле джевап берди: «Юдже Аллах (Субханаху ва Та’аля) онъа ольмектен эвель хайыр амеллер огютлей ве бойле вазиетте онынъ джаныны ала».
Ахмад (4/200), Табарани «Му’джам аль-Кабир» Аби ‘Инаба сёзлеринден. Шейх аль-Альбани хадиске сахих деди, «Сахих аль-джами’ ас-сагъир» (307) ве «ас-Сильсиля ас-сахиха» (1114).
Юдже Аллах бизлерни абаданлаштыргъан ве бойле табийлик вазиетте джанымызны бергенлерден япсын.
Онынъ ичюн Рамазан – кунь девамында юкъланаджакъ, гедже софраларында отурыладжакъ, бош лафлар юрьгизиледжек, эгленилиджек вакъыты дегиль. Ёкъ! Онынъ эн биринджи саниесинден бу Къуран вакъыты, намаз вакъыты, бу садакъа вакъыты, оразалы кимсени ашатыладжакъ вакъыты, теравих намазы вакъыты. Ихмал этме! Демеки: «Мен бугунь болдурдым», «Мен Рамазаннынъ сонунда япаджам». Арткъа къойма! Акъылынъда тут, сенинъ макъсадынъ – Рамазандан афу иле чыкъмакътыр.
بسم الله الرحمن الرحيم
Ey Allahın qulu! Ramazan ayında, seniñ ögünde en önemli ve ayrette qaldıracaq maqsad tura! Seniñ ögünde önemli maqsad tura, ve bu maqsad seniñ içün stimul olmaq kerek! Saña belâ olsun! Ey Allahın qulu, şimdi aytılacaq sözlerge qulaq asmasañ, — saña belâ olsun, çünki seniñ içün cezağa ve seniñ içün belâğa, köklerde Allahnıñ vekili olğan dua yaptı (aminu s-sama’)! Yer yüzünde vekil olğanı ise, kökteki vekilniñ duasına «Amin» dedi. Meleklerniñ en güzeli Cibril (aleyhi selâm) bu nasihatnı dinlemegenge belânen cezalamağa Yüce Allaha dua etti. Cibril, Yüce Allaha bu duanen muracat etken zamanda resullerniñ ve elçilerniñ en güzeli Muhammed ﷺ «Amin» dedi.
Ramazan – bu rahmettir, amma erkes içün degildir, ey Allahın qulları! Ramazan insan içün rahmet sebebi yada ceza sebebi ola bilir. Bazı namaz qılğan ve oraza tutqan kimseler içün bu ay ceza sebebi ola bilir, ve bu aqqında Peyğamberimiz ﷺ dedi:
«Öyle olurki, oraza tutqan kimsege onıñ orazasından açlıqtan ğayrı bir şey qalmaz, ve öyle olurki o gece namazlarını qıldı, amma onıñ gece namazlarından oña tek yuqusızlıq qalır».
İbn Macah (1690), Nasai «Sunan al-Kubra» (3249), Şeyh al-Albani bu hadiske sahih dedi «Sahih al-Cami’ as-sağir» (3488) ve «Sahih at-Tarğib ua-t-tarhib» (1083).
Ey Allahın qulu, böyle kategoriya insanları içinde olmaqtan saqın!
Onıñ içün, ey Allahın qulu, men saña haber etmege mecburım, tezden sen Ramazanğa kireceñ – özüñ içün maqsad ve vazifelerni tayin et. Bu ayda seniñ maqsadlarıñ nasıl?! Seniñ şahsiy vazifeñ (fard ayn) – bu oraza tutmaqtır, amma bu seniñ ilk vazifeñ degil. Bundan ğayrı daan şahsiy vazifeñ bar – bu ayda Yüce Allahtan bağışlav qazanmaq. Ebet, bu vaciptır! Demekki, eger sen bu ayda bağışlav qazanmağa areket yapmasañ, seniñ üstüñe günah olacaq! Alimler deyler, «Ramazan» kelimesi «ramada» / qızmaq fiilinden kele. Ne içün onıñ manası böyle? Çünki Ramazan – bu öyle ay ki, insan bu ayğa kirerken, onıñ günahları bu ay devamında yanmaq kerek. O öz günahlarından arınmaq kerek!
Bu Quran ayıdır, ebet! Allahnıñ Kitabı seniñ içün nasıl rahmet olğanı kibi, öylede ceza ola bilir, çünki Yüce Allah (Subhanahu va Ta’alâ) Öz Kitabında böyle buyura:
﴾وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِّلْمُؤْمِنِينَ وَلَا يَزِيدُ الظَّالِمِينَ إِلَّا خَسَارًا﴿
«Biz Qur’andan öyle bir şey endirmektemiz ki, O mu’minler içün şifa ve rahmettir; zalımlarnıñ ise, yalıñız ziyanını arttırır».
(«al-İsra», 17:82).
Onıñ içün selefler ayta ediler, bir kimse Quran oqumağa oturıp, asla aqibet almadan turıp olamaz. Mıtlaqqa onıñ artından bir şey devam eter – yada seniñ faydaña, yada seniñ zararıña. Ümer ibn al-Hattab öz idare etken devirinde Mekkege keldi, Mekkede tayin etken öz vekilinen körüşti ve ondan soradı: «Sen dere sakinlerine vali olaraq kimni tayın ettiñ?»
O dedi: «İbn Abzanı tayin ettim».
Ümer soradı: «İbn Abza kimdir?»
O dedi: «İbn Abza – bu azatlıq alğan qullardan birisi».
Ümer soradı: «Evelde qul olğan kimseni tayin ettiñizmi?»
Acayip şey, bir kimse tapılmadı ve qulnı tayin ettiler. O zaman vali Ümerge añlattı: «Çünki İbn Abza – aramızda Qurannı en güzel bile».
O zaman Ümer ibn al-Hattab dedi: «Aqiqatten Peyğamberimiz ﷺ dedi:
“Şubesiz bu Quran sebebinden Yüce Allah (Subhanahu va Ta’alâ) milletlerni yükselte ve bu Quran sebebinden milletlerni aşşağılata”».
Ahmad (1/35), Müslim (817) ve İbn Macah (218). Şeyh al-Albani bu hadiske sahih dedi «Sahih al-cami’ as-sağir» (1896).
Quran sebebinden yükseltilgen milletler, — bu Quranğa sım-sıq sarılğan kimselerdir; aşşağılanğan milletler ise, — Qurannı red etken kimselerdir.
Bu ayetni tıñlañız; pek az kimse onıñ manasını añlay:
﴾لَقَدْ أَنزَلْنَا إِلَيْكُمْ كِتَابًا فِيهِ ذِكْرُكُمْ أَفَلَا تَعْقِلُون﴿َ
«Ant olsun, sizge içinde siz içün ögüt bulunğan bir kitap endirdik. Alâ aqıllanmazsıñızmı?»
(«al-Enbiya», 21:10).
Bizim vaziyetimiz aşşağı olacaq yada Yüce Allah (Subhanahu va Ta’alâ) bizlerge büyüklik berecekmi, nasıl biz Quranğa bağlanğanımıznen bağlı. Quranda bizim faziletimiz! Onıñ içün, ne zaman musulmanlar Quran ve Sunnetke sım-sıq sarılğanlarda, olardan erkes qorqa edi ve olarnı ürmet ete ediler. Ne zaman ise musulmanlar Qurannı ve Sunnetni sırtlarını artına taşladılar, o zaman olarnen şimdiki vaziyet olıp başladı – musulmanlar aşşalanma vaziyette oldılar. Onıñ içün bu ayet er zaman bizim közlerimizni ögünde olsun, onı er zaman hatırlañ:
﴾لَقَدْ أَنزَلْنَا إِلَيْكُمْ كِتَابًا فِيهِ ذِكْرُكُمْ أَفَلَا تَعْقِلُون﴿َ
«Ant olsun, sizge içinde siz içün ögüt bulunğan bir kitap endirdik. Alâ aqıllanmazsıñızmı?»
(«al-Enbiya», 21:10).
Yüce Allah (Subhanahu va Ta’alâ) bu Quran sebebinden milletlerni yükselte ve bu quran sebebinden başqa milletlerni aşşalata. Ramazan ayı insanlar içün ceza sebebi olıp çevirilmesi mümkün.
Şimdi sen mektepke kiresiñ. Bu ay devamında sen Ramazan mektebinde oquycañ. Sen onı bitirip imtihanlarnı bermek kereksiñ. Nasıl imtihan? Sen günahlarıña afu qazanmaq kereksiñ, böylece sen imtihannı bergen olursıñ.
Yedi sahabe! Yedi! Peyğamberimizni ﷺ yedi sahabesi rivayet ettiler:
«Bir zaman Peyğamberimiz ﷺ öz mimberine er sefer köterilgen kibi degil şekilde köterildi. O birinci basamaqqa köterildi ve: “Amin”, dedi; son ise ekinci basamaqqa köterildi ve kenede: «Amin», dedi; son ise üçünci basamaqqa köterildi ve: «Amin», dedi».
Son ise sahabeler soradılar: «Ey Allahnıñ Elçisi, ne içün üç kere «Amin» dediñ».
O zaman Peyğamberimiz ﷺ añlattı: «Maña Cibril keldi ve o dedi: “Ey Muhammed, seniñ adıñ añılğanda, seniñ içün Allahtan salât soramağan (yani Allahnıñ salât ve selâmları oña olsun/ sallâ Llahu ‘aleyhi ua sallâm) kimse, aşşağı vaziyette qalsın (başqa rivayette aytıla: «Cennetten ve rahmetten uzaq olsun»)”. Muhammed: «Amin ayt», dedi, ve men «Amin» dedim. Son ise men ekinci basamaqqa köterilgenimde, Cibril dedi: “Ey Muhammed, ana-babasına, yada ekisinden birisine rast kelip, olar onıñ Cennetke kirmesine sebeb olmağan kimseni (Cennetke kirmek içün olarğa güzel davranmadı) vaziyeti aşşağı olsun”. O dedi: «Muhammed “Amin” ayt», ve men «Amin» dedim. Son Cibril dedi: “Ramazan ayına yaşap yetken, ve bağışlav qazanıp olamağan kimseni vaziyeti aşşağı olsun”. “Amin” ayt, ve men «Amin» dedim».
Tabarani «Mu’cam al-Kabir» (2022), ibn Huzayma (1888), ibn Hibban (2378). Şeyh al-Albani bu hadiske sahih dedi «Sahih al-cami’ as-sağir» (75) ve «Sahih at-tarğib ua-t-tarhib» (1678—1679).
Cibril böyle dua yaptı! O, Ramazan ayında afu qazanmağan kimse içün – qolundan kelgenini yapmağanı içün, ceza ve aşşalama soradı.
Onıñ içüñ, ey Allahın qulu, seniñ en önemli vazifeñ — bu Ramazannıñ başında öz maqsadlarıñnı tayın etmektir. Ya seniñ maqsadıñ nasıl? Yüce Alahtan afu qazanmaq. Bu seniñ orazañnı maqsadıdır!
Baq, seniñ duşmanıñ zıncırlarğa buğavlanacaq. En hişimli cin ve şeytanlar zıncırlarğa buğavlanacaqtır. Böylece, olar er zaman yapqanını yapıp olamaycaqlar; er vaqıt kibi saña vesvese yapıp, günahqa davet etip olamaycaqlar. Sen bu duşmandan serbest olacañ, Allaha hamd olsun!
Saña er gece dellâl davet etip muracat etecek, ve seni teşviq eterken aytacaq:
«Ey hayır istegen, areket et! Ey günah yapmağa istegen, özüñni tut!»
Tirmizi (682), ibn Macah (1642), Hakim (1/421). Bu hadis sahih olğanını şeyh al-Albani tasdıqladı.
Yüce Allah (Subhanahu va Ta’alâ) saña bütün şaraitler azırladı – seniñ fikirleriñ Yüce Allaha ibadet etmek içün temizlenmesine O seni aştan, suvdan, cinsiy yaqınlıqtan mahrum qaldırdı. Ne zaman insan toq olğan son, o günah yapmağa tırışa. Allah seni cinsiyet hoşluqlardan mahrum qaldıra. Seniñ geceñni Yüce Allah (Subhanahu va Ta’alâ) nenen meşğul etti? Allah sevgen amellernen – gece namazlarında turmaqnen. Böylece, Yüce Allah (Subhanahu va Ta’alâ) seniñ içün ayrı terbiye programması azırladı, bütün seniñ boş vaqıtıñnı hayırnen toldurdı, o mektepni bitirgen son, öz duşmanıñnen savaş yapmaq içün. Çünki bu duşman yuqlamay – şeytan yuqlamay. Hasan al-Basri aytqanı kibi: «O yuqlasa edi, bizde raatlanır edik».
«Talbisu İblis», 49 s.
Bu duşmannıñ en önemli maqsadı ne! O seni Cennetten mahrum qaldırmağa istey, o seniñ Rabbiñni bağçalarını tutıp almağa istey. Bu duşmannen savaş, biñ yıllar devam ete. Bu savaş bizim Adem (aleyhi selâm) atamız devirinden devam ete. Arbiy adamlar bileler, ne qadar çoq savaş uzaya, o qadar çoq oña sabır kerek. Ondan ğayrı, ne qadar savaş etilgen mal emiyetli şey ise (bu Cennet), o qadar bu savaş qiymetlidir. Ve ne qadar duşmannı aynecilik yapmağa, apansızlıq yapmağa istidatı bar ise, o qadar bizden açıqkozlik talap etile. Onıñ içün, ey menim qardaşlarım, bu şimdi biz kirecek mektep, bizlerden faalikni ve areketlikini talap ete. Kündüz bizden öz nefsimizniñ arzularından red etmek talap etile, gece ise Yüce Allah (Subhanahu va Ta’alâ) bizlerni namazlarnen meşğul etti.
Onıñ içün bu fırsatqa, bu imkâniyetke ciddiy baqıñız. Yılda bir ay! Tek bir ay yılda – yigirmi doquz yada otuz kün. Onı boşuna masraf etme! Seni Qurandan, Allahnı añmaqtan, istiğfar yapmaqtan, dua ve namazlar qılmaqtan çekken şeylerni çetke qoy. Gacetlerni, internet ve haber saytlarını, kino ve oyunlarnı çetke çek – olardan bir ayğa vazgeç! Sen on eki aydan bir ayda bunı yapmağa çareñ barmı? Bu oyunlar, gacet ve internetler saña Mahşer künü asla yardım etip olamazlar. Sen çiplaq turacañ! Çiplaq, yalınayaq ve sunnet etilmegen!
Özüñni tesavur et. Başqa insanlarnı degil, özüñni! Şimdi seni çiplaq meydanğa çıqaracaqlarını tesavur et. Sen özüñni nasıl beceriksiz duyacaqsıñ? O künü, sen çiplaq ve sunnet etilmegen vaziyette, saña oşağan insanlarnen en büyük Makemege keteceksiñ – esapqa keteceksiñ! Ana o zaman sen, qaçırğan ve boşuna keçirgen er bir saniyeñ içün ve er bir nefesiñ içün peşman eteceksiñ.
On bir aynı sen nasıl keçirdiñ, onı Yüce Allah (Subhanahu va Ta’alâ) bile… Qaç kere aqiqatten Quran oqudıñ?! Qaç kere sen Allahnıñ Kitabını qoluña alıp, çin örekten onı oqudıñ? Qaç kere sen Allahtan afu sorap ağladıñ?! Ne qadar tabiy namazlar sen qıldıñ?! Sağğa ve solğa fikiriñ uçıp ketmegen namazlar, kalpten olğan namazlar? Qaç kere sen ihlâslı olaraq Yüce Allaha gecelerde dua yaptıñ? En azında, endi közüñni aç! Közüñni aç! Seniñ Rabbiñni dellâlı saña kökten muracat ete – sen onı eşitmeysiñ, amma o saña dey: «Ey hayır istegen, oña areket et! Ey zulüm istegen. Ondan vaz geç!»
Çoq insanlar ise yaşayış qiymıldısına, mal-mülk artından çapmağa battılar. Öyle ola ki. İnsan Ramazan ayına kire, amma bu ay kelgenini daan añlap olamay. O sankim paravoz kibi bu dunyanıñ işleri, qazanmaq, hayat ve isteklernen sarılmaq, bu dunyanı malını arzu etmek çıtasında yel kibi uça. Çapa, çapa, son ise özüne kele, ve añlay endi Ramazannıñ yarısı keçti! Öyle ola ki, insan Ramazannıñ birinci yarısında epçil ola, amma uyana taba o zaifleşe, ve Ramazannıñ ortasına o ibadetlerinde soluq ola.
Ey Allahın qulu, bu sayuvlı künler! Yüce Allah (Subhanahu va Ta’alâ) dey:
«Sayılı künlerde olmaq üzre».
(«al-Baqara», 2:184).
Onıñ er bir kününe birinci saniyesinden başlap pek qiymetlidir! Sen esiñni toplağanıña qadar Ramazannen endi vedalaşacaqlar. Belkim da. Bu seniñ sonki Ramazanıñdır. Belkim ayni bu amellernen sen Yüce Rabbiñe qavuşacañ. Belkim ölüm melegi seni ayni bu Ramazandan son alacaq. Onıñ içün er daqqañda baq, seni nasıl vaziyette Yüce Allah ala bilir.
Onıñ içün Peyğamberimiz ﷺ böyler sözler ayttı:
«Eger Yüce Allah insan içün hayır istese onı abadanlaştıra».
İnsanlar soradılar: «Abadanlaştırmaq, bu ne demek?»
Peyğamberimiz ﷺ böyle cevap berdi: «Yüce Allah (Subhanahu va Ta’alâ) oña ölmekten evel hayır ameller ögütley ve böyle vaziyette onıñ canını ala».
Ahmad (4/200), Tabarani «Mu’cam al-Kabir» Abi ‘İnaba sözlerinden. Şeyh al-Albani hadiske sahih dedi, «Sahih al-cami’ as-sağir» (307) ve «as-Silsilâ as-sahiha» (1114).
Yüce Allah bizlerni abadanlaştırğan ve böyle tabiylik vaziyette canımıznı bergenlerden yapsın.
Onıñ içün Ramazan – kün devamında yuqlanacaq, gece sofralarında oturılacaq, boş laflar yürgizilecek, eglenilicek vaqıtı degil. Yoq! Onıñ en birinci saniyesinden bu Quran vaqıtı, namaz vaqıtı, bu sadaqa vaqıtı, orazalı kimseni aşatılacaq vaqıtı, teravih namazı vaqıtı. İhmal etme! Demeki: «Men bugün boldurdım», «Men Ramazannıñ sonunda yapacam». Artqa qoyma! Aqılıñda tut, seniñ maqsadıñ – Ramazandan afu ile çıqmaqtır.
Тазе тефсирлер