بسم الله الرحمن الرحيم
Latin urufatında oqumaq
Юдже Аллах (Субханаху ва Та’аля) яраткъан эр бир махлюкъыны незарет эте ве Онынъ незаретинден ич бир шей къачып оламаз. Эр бир шей Онынъ контролиндедир. Инсан, устюнде бу незарет олгъаныны ич бир вакъыт унутмамакъ керектир, Юдже Аллах онынъ эр бир амелинде, сёзюнде ве ниетинде незарет эткенинен яшамакъ керектир.
«Аллаh эр шейни козетер».
(«аль-Ахзаб», 33:52).
Сен бильмек керексинъ, сенинъ эр бир япкъанынъдан Юдже Аллах (Субханаху ва Та’аля) хабердардыр: эр бир сёзюнъ, эр бир фикиринъ, эр бир ниетинъ ве амелинъ. О, сенинъ акъиданъдан, сёзлеринъден ве арекетлеринъден хабердардыр.
Юдже Аллах (Субханаху ва Та’аля) бойле деди:
«Сен, О мутлакъ гъалип ве бол мерхамет саибине ишанып таян. О ки, (гедже намазгъа) къалкъкъан заманынъда, сени корьмекте. Седжде эткенлер арасында долашувынъны да корьмекте».
(«аш-Шуара», 26:217-219).
Сени, гедже намазларыны окъугъанынъ еринъни бир кимсе корьмесе биле Юдже Аллах (Субханаху ва Та’аля) корьмектедир. Сен, бир шей корюнмеген къаранлыкъ ичинде олсанъ биле, Юдже Аллах (Субханаху ва Та’аля) сени незарет эте.
Бакъынъыз, не ичюн бу айтылгъан аетлерде намазнынъ тек эки унсуры хатырлана – къиям ве седжде? Чюнки къыям – бу, намазда окъулгъан зикр тарафындан алсакъ, намазнынъ энъ шерефли къысымыдыр, седжде исе – инсаннынъ намазда олгъан арекетлерине бакъсакъ, къыямдан даа шерефлидир.
Къыям седждеден даа шерефлидир, чюнки бу ерде Къуран окъула – сёзлернинъ энъ гузели, Юдже Аллахнынъ сёзю. Седжде исе даа шерефли, чюнки инсан бу алда Раббисине даа якъындыр ве бу акъкъында хадисте ривает этиле:
«Озь Раббисине, къул седжде япкъан заман пек якъындыр».
Онынъ ичюн, бизлерге, седждеде булунгъанымыз вакъыт Юдже Аллахкъа дуа иле даа зияде мураджаат этмек эмир этильгендир. Насыл О сенинъ япкъан эр бир амелинъни корьгени киби, эр бир айткъан сёзюнъниде О эшитмектедир.
«Ёкъса, биз оларнынъ сырларыны ве гизли лакъырдыларыны эшитмедик беллейлерми? Ёкъ, ойле дегиль; янларындаки эльчилеримиз язмакътадырлар».
(«аз-Зухруф», 43:80).
Инсан не десе десин, яхшы яда ярамай, ачыкъ я да сырлы, булар эписи я да онынъ файдасы ичюн язылмакъта, я да онынъ зарары ичюн язылмакъта.
Ве бу акъкъында Юдже Раббимиз бойле буюра:
«Инсан ич бир сёз сёйлемез ки, янында козетиджи язмагъа азыр бир мелек олмасын».
(«Къаф», 50:18).
Бизим бутюн айткъанымыз аман языла, онынъ ичюн бизим агъзымыздан тек бизге файда кетиреджек сёзлер чыкъмакъ керектир. Тильден, Махшер куню эсап бериледжек олгъан ич бир шей къутылып чыкъмасын. Сенинъ тилинъ я да эр заман хакъ сёз айтсын я да суссын.
Пейгъамберимиз ﷺ бойле деди:
«Ким де ким Аллахкъа ве Ахирет кунюне инанса, хайыр шейлер айтсын я да суссын».
Онынъ ичюн биль ве хатырла: Юдже Аллах (Субханаху ва Та’аля) эр бир шейден хабердар – тек сенинъ сёзлеринъ дегиль, сенинъ къальбинъде сакълы олгъаны биле: акъиданъ, ниетлеринъ, арзуларынъ. Озь къальбинъни бир бакъ – анда Аллахнынъ ачувыны чыкъараджакъ бир шей ёкъмы аджеба: ширк, рия, четке чекилюв, пакъыллыкъ, иман эткенлерге нефрет, терсине хакъны ред эткенлерге севги. Онынъ ичюн Юдже Аллах незарет эткен юрегинъе мукъайт ол.
Юдже Аллах (Субханаху ва Та’аля) Озь Китабында бойле буюрмакъта:
«Ант олсун, инсанны биз яраттыкъ ве нефсининъ онъа фысылдагъанларыны билирмиз».
(«Къаф», 50:16).
Бир шей айтмакътан эвель къальбинъе бакъ – чюнки айни андан айткъан сёзлеринъ чыкъмакъта. Тилинъде белли олмадан, ичинъде яратылгъанына мукъайт ол. Онынъ ичюн учь шейде – сёзлеринъде, амеллеринъде ве къальбинъде олгъан сырлы шейде муракъаба олмакъ керектир – Юдже Аллах сени эр заман незарет эткенини дуймакъ керексинъ. Не заман Пейгъамберимизден ﷺ ихсан акъкъында сорадылар, о ﷺ бойле джаваб берди:
«Ихсан – бу не заман сен Раббинъни санки корьген киби ибадет этесинъ. Сен Оны корюп оламасанъ биле, биль ки, О, сени эр заман корьмекте».
Бойледже, Раббинъни огюнъде корьгенинъ киби ибадет эт. Эгер бу мумкюн дегильсе, энъ азында Юдже Аллах сени эр заман незарет эткенини ве эр бир шейни контроль эткенинден хабердар олып ибадет эт. Инсан Раббисининъ незаретинден эр заман хабердар олмакъ керектир.
•••••❁⚜️❁•••••┈┈•••••❁⚜️❁•••••❁⚜️❁•••••❁⚜️❁•••••┈┈•••••❁⚜️❁•••••
Allahnıñ nezareti aqqında (muraqaba)
Yüce Allah (Subhanahu va Ta’alâ) yaratqan er bir mahlüqını nezaret ete ve Onıñ nezaretinden iç bir şey qaçıp olamaz. Er bir şey Onıñ kontrolindedir. İnsan, üstünde bu nezaret olğanını iç bir vaqıt unutmamaq kerektir, Yüce Allah onıñ er bir amelinde, sözünde ve niyetinde nezaret etkeninen yaşamaq kerektir.
«Allah er şeyni közeter».
(«al-Ahzab», 33:52).
Sen bilmek kereksiñ, seniñ er bir yapqanıñdan Yüce Allah (Subhanahu va Ta’alâ) haberdardır: er bir sözüñ, er bir fikiriñ, er bir niyetiñ ve ameliñ. O, seniñ aqidañdan, sözleriñden ve areketleriñden haberdardır.
Yüce Allah (Subhanahu va Ta’alâ) böyle dedi:
«Sen, O mutlaq ğalip ve bol merhamet saibine işanıp tayan. O ki, (gece namazğa) qalqqan zamanıñda, seni körmekte. Secde etkenler arasında dolaşuvıñnı da körmekte».
(«aş-Şuara», 26:217-219).
Seni, gece namazlarını oquğanıñ yeriñni bir kimse körmese bile Yüce Allah (Subhanahu va Ta’alâ) körmektedir. Sen, bir şey körünmegen qaranlıq içinde olsañ bile, Yüce Allah (Subhanahu va Ta’alâ) seni nezaret ete.
Baqıñız, ne içün bu aytılğan ayetlerde namaznıñ tek eki unsurı hatırlana – qiyam ve secde? Çünki qıyam – bu, namazda oqulğan zikr tarafından alsaq, namaznıñ eñ şerefli qısımıdır, secde ise – insannıñ namazda olğan areketlerine baqsaq, qıyamdan daa şereflidir.
Qıyam secdeden daa şereflidir, çünki bu yerde Quran oqula – sözlerniñ eñ güzeli, Yüce Allahnıñ sözü. Secde ise daa şerefli, çünki insan bu alda Rabbisine daa yaqındır ve bu aqqında hadiste rivayet etile:
«Öz Rabbisine, qul secde yapqan zaman pek yaqındır».
Onıñ içün, bizlerge, secdede bulunğanımız vaqıt Yüce Allahqa dua ile daa ziyade muracaat etmek emir etilgendir. Nasıl O seniñ yapqan er bir ameliñni körgeni kibi, er bir aytqan sözüñnide O eşitmektedir.
«Yoqsa, biz olarnıñ sırlarını ve gizli laqırdılarını eşitmedik belleylermi? Yoq, öyle degil; yanlarındaki elçilerimiz yazmaqtadırlar».
(«az-Zuhruf», 43:80).
İnsan ne dese desin, yahşı yada yaramay, açıq ya da sırlı, bular episi ya da onıñ faydası içün yazılmaqta, ya da onıñ zararı içün yazılmaqta.
Ve bu aqqında Yüce Rabbimiz böyle buyura:
«İnsan iç bir söz söylemez ki, yanında közetici yazmağa azır bir melek olmasın».
(«Qaf», 50:18).
Bizim bütün aytqanımız aman yazıla, onıñ içün bizim ağzımızdan tek bizge fayda ketirecek sözler çıqmaq kerektir. Tilden, Mahşer künü esap berilecek olğan iç bir şey qutılıp çıqmasın. Seniñ tiliñ ya da er zaman haq söz aytsın ya da sussın.
Peyğamberimiz ﷺ böyle dedi:
«Kim de kim Allahqa ve Ahiret kününe inansa, hayır şeyler aytsın ya da sussın».
Onıñ içün bil ve hatırla: Yüce Allah (Subhanahu va Ta’alâ) er bir şeyden haberdar – tek seniñ sözleriñ degil, seniñ qalbiñde saqlı olğanı bile: aqidañ, niyetleriñ, arzularıñ. Öz qalbiñni bir baq – anda Allahnıñ açuvını çıqaracaq bir şey yoqmı aceba: şirk, riya, çetke çekilüv, paqıllıq, iman etkenlerge nefret, tersine haqnı red etkenlerge sevgi. Onıñ içün Yüce Allah nezaret etken yüregiñe muqayt ol.
Yüce Allah (Subhanahu va Ta’alâ) Öz Kitabında böyle buyurmaqta:
«Ant olsun, insannı biz yarattıq ve nefsiniñ oña fısıldağanlarını bilirmiz».
(«Qaf», 50:16).
Bir şey aytmaqtan evel qalbiñe baq – çünki ayni andan aytqan sözleriñ çıqmaqta. Tiliñde belli olmadan, içiñde yaratılğanına muqayt ol. Onıñ içün üç şeyde – sözleriñde, amelleriñde ve qalbiñde olğan sırlı şeyde muraqaba olmaq kerektir – Yüce Allah seni er zaman nezaret etkenini duymaq kereksiñ. Ne zaman Peyğamberimizden ﷺ ihsan aqqında soradılar, o ﷺ böyle cavab berdi:
«İhsan – bu ne zaman sen Rabbiñni sanki körgen kibi ibadet etesiñ. Sen Onı körüp olamasañ bile, bil ki, O, seni er zaman körmekte».
Böylece, Rabbiñni ögüñde körgeniñ kibi ibadet et. Eger bu mümkün degilse, eñ azında Yüce Allah seni er zaman nezaret etkenini ve er bir şeyni kontrol etkeninden haberdar olıp ibadet et. İnsan Rabbisiniñ nezaretinden er zaman haberdar olmaq kerektir.
Тазе тефсирлер