بسم الله الرحمن الرحيم
Latin urufatında oqumaq
Рамазан айнынъ сонъки геджелеринде олгъан тенбеллик ве заифлик
Пейгъамберимиз ﷺ дюнья хаяты татлы, тазе, ешиль, озюне чекиджи, деп бизлерни тенбийледи.
Эльбетте, бизлер ичюн сыр дегиль, инсанлар дюнья хаятынынъ файдасы ичюн тюрлю агъырлыкъларгъа сабыр этмеге, геджелери юкъламамагъа азырлар. Амма, не заман ахирет акъкъында лаф этиле, инсан япмамакъ ичюн озюне тюрлю себеплер ве маналар къыдырып башлай ве озюни алдата. Юдже Аллах (Субханаху ва Та’аля) дей:
«Артыкъ инсан озь-озюнинъ шаатыдыр».
«(аль-Къияма), 75:14»
Эгер эр бир инсан озюне итираф этсе, о къолайнен биледжек, о ахирет хаятынынъ амеллерини ред эте яда къалдыра, чюнки онынъ шариат тарафындан гечерли себеплери бар яда о маначыкъ къыдыра: онынъ азачыкъ тизи агъырмакъта, яда о болдурды. Бу маначыкъ себебинден инсан, оны гюнах пислигинден темизлейджек буюк амеллерни ред эте. Гюнах писликлеринден бу дюньяда белялар иле, оледжекте джезалар иле, мезарда джеза иле, махшер куню джеза иле, Джехеннемде джеза иле арынмакъ ерине, Юдже Аллах (Субханаху ва Та’аля) санъа Озь мерхамети себебинден санъа буюк амеллер насиб этти. Хаз хаятына кирмеге бу амеллер себеп оладжакътыр. Аллахнынъ джёмертлигинден сораймыз.
Заифлик ве тенбеллик инсанларгъа кедер этмекте. Онынъ ичюн Пейгъамберимиз ﷺ бу къасталыкълардан Юдже Аллахкъа ялваргъан. Заифлик – бу не заман инсанынъ бир шей япмагъа чареси бар, амма о тенбеллик ве къуветсизлик корьсете. Тенбеллик пек чокъ инсанларгъа аиттир. Онынъ ичюн Пейгъамберимиз ﷺ пек чокъ Юдже Аллахкъа тенбелликтен, къуветсизликтен, заифликтен дуа эткен. Не ичюн? Чюнки бу къасталыкълар буюк зараргъа кетире билир, Аллах бизни къорчаласын!
Сизге пек сыкъ айтылгъан хайырлы хаберни динъленъиз, бельки сиз оны къулакъ огюнден кечиресинъиз, бельки о къалбинъизге синъмей. Бу Пейгъамберимизнинъ ﷺ сёзлери:
«Ким де ким Юдже Аллахнынъ мукяфатына инанып, умют этип Рамазан айында гедже намазыны къылса, онынъ бутюн кечмиш олгъан гюнахлары афу этиледжек».
Дигер хадисте айтылгъан: «Ким де ким Къадыр геджесини иман ве умют иле намазда кечирсе, онынъ бутюн кечмиш олгъан гюнахлары афу этиледжек».
Бу сонъки он гедже хемен башламакъта. Бу энъ гюзель геджелер. Бу Алахнынъ пек къийметли хедиесидир!
Бу амеллер иле шимди гюнахларынъдан арынмагъа имкянынъ бар. Омюринънинъ йыллары девамында япкъан ярамайлыкълардан арынмагъа имкянынъ бар. Раббинъе къаршы насыл джинает яптынъ, Аллахнынъ къуллары огюнде насыл джинает яптынъ. Эльбетте Аллахнынъ махлюкъалары огюнде афу истемек керектир, амма биринджиден биз Раббимизге тёвбе япамыз, сонъ исе Раббимиз Онынъ махлюкъларындан афу сорамагъа ярдым эте. Озюнъе маначыкълар къыдырып бу фырсатны къачырмагъа мумкюнки аджеба?!
Инсан дей: «Манъа къолай дегиль». Эльбетте къолай дегиль. Сен исе насыл тюшюндинъ? Сен беллединъ Дженнет къолайнен къазаныламы? Дженнет – бу пек палы мал. Дженнет – бу эбедий раатлыкъ, сен анда олюмден, фукъареликтен, къартлыкътан, якъынларынънен айырылмакътан къоркъмайджанъ, анда къасталыкъ, азап ве белялар олмайджакъ. Бу шейлерни къолайлыкънен къазанырым деп тюшюнесинми? Пейгъамберимиз ﷺ деди:
«Дженнет агъырлыкънен сарылгъандыр».
Дженнет агъырлыкънен сарылгъандыр. Ёкъса етиштирерим, деп тюшюнесинъми. Бу сене олмаса келер сене олур. Келеджек сене олмаса, сонъра олур. Сен бошуна бойле тюшюнесинъ, чюнки Пейгъамберимиз ﷺ , озьлеринъизни олюлер сырасында деп тюшюнинъиз деди. Сен билип оламасынъ, санъа 10 Рамазан яда 15 Рамазан насиб оладжакъ. Бельки бу сенинъ сонъки рамазанынъдыр. Бельки сенде дигер фырсат олмайджакъ. Яда сенинъ ишлеринъ гюзель, сенинъ асла гюнахларынъ ёкъ? Яда сен о къадар хайыр амель топладынъ, санъа энди къоркъмамакъ мумкюн? Санъа раатлыкънен амель мекянындан эсап мекянына кетмеге мумкюн ми? Бельки сен бильмейсинъ, бутюн кечмиш ве келеджек гюнахлары афу этильген, бу гюнахлары афу этильгенине бакъмадан бу геджелерни гъайрет иле ибадетте кечире эди. О озь ибадетини даа гюзель япмакъ ичюн озь изарыны къатты багълай эди, апайларындан узакълаша эди, озь аилесини уятып бу геджелерни ибадетте кечире эди. Аише анамыз ривает эте:
«Рамазан айнынъ сонъки он геджелери кельгенинде, о геджелерини ибадетте кечире эди».
Дигер геджелерде исе Пейгъамберимиз ﷺ гедженинъ бир парчасыны юкълай эди, дигер прачасында исе ибадет эте эди.
Онынъ ичюн хафиф олма, акъылсыз олма, озь истеклеринънинъ, арзуларынънынъ, озь нефсинънинъ къулу олма, чюнки бу геджелер пек къийметлидир! Буны сен анъласанъ эдинъ!
•••••❁⚜️❁•••••┈┈•••••❁⚜️❁•••••❁⚜️❁•••••❁⚜️❁•••••┈┈•••••❁⚜️❁•••••
Ramazan aynıñ soñki gecelerinde olğan tenbellik ve zaiflik
Peyğamberimiz ﷺ dünya hayatı tatlı, taze, yeşil, özüne çekici, dep bizlerni tenbiyledi.
Elbette, bizler içün sır degil, insanlar dünya hayatınıñ faydası içün türlü ağırlıqlarğa sabır etmege, geceleri yuqlamamağa azırlar. Amma, ne zaman ahiret aqqında laf etile, insan yapmamaq içün özüne türlü sebepler ve manalar qıdırıp başlay ve özüni aldata. Yüce Allah (Subhanahu va Ta’alâ) dey:
«Artıq insan öz-özüniñ şaatıdır».
«(al-Qiyama), 75:14»
Eger er bir insan özüne itiraf etse, o qolaynen bilecek, o ahiret hayatınıñ amellerini red ete yada qaldıra, çünki onıñ şariat tarafından geçerli sebepleri bar yada o manaçıq qıdıra: onıñ azaçıq tizi ağırmaqta, yada o boldurdı. Bu manaçıq sebebinden insan, onı günah pisliginden temizleycek büyük amellerni red ete. Günah pisliklerinden bu dünyada belâlar ile, ölecekte cezalar ile, mezarda ceza ile, mahşer künü ceza ile, Cehennemde ceza ile arınmaq yerine, Yüce Allah (Subhanahu va Ta’alâ) saña Öz merhameti sebebinden saña büyük ameller nasib etti. Haz hayatına kirmege bu ameller sebep olacaqtır. Allahnıñ cömertliginden soraymız.
Zaiflik ve tenbellik insanlarğa keder etmekte. Onıñ içün Peyğamberimiz ﷺ bu qastalıqlardan Yüce Allahqa yalvarğan. Zaiflik – bu ne zaman insanıñ bir şey yapmağa çaresi bar, amma o tenbellik ve quvetsizlik körsete. Tenbellik pek çoq insanlarğa aittir. Onıñ içün Peyğamberimiz ﷺ pek çoq Yüce Allahqa tenbellikten, quvetsizlikten, zaiflikten dua etken. Ne içün? Çünki bu qastalıqlar büyük zararğa ketire bilir, Allah bizni qorçalasın!
Sizge pek sıq aytılğan hayırlı haberni diñleñiz, belki siz onı qulaq ögünden keçiresiñiz, belki o qalbiñizge siñmey. Bu Peyğamberimizniñ ﷺ sözleri:
«Kim de kim Yüce Allahnıñ mukâfatına inanıp, ümüt etip Ramazan ayında gece namazını qılsa, onıñ bütün keçmiş olğan günahları afu etilecek».
Diger hadiste aytılğan: «Kim de kim Qadır gecesini iman ve ümüt ile namazda keçirse, onıñ bütün keçmiş olğan günahları afu etilecek».
Bu soñki on gece hemen başlamaqta. Bu eñ güzel geceler. Bu Alahnıñ pek qiymetli hediyesidir!
Bu ameller ile şimdi günahlarıñdan arınmağa imkânıñ bar. Ömüriñniñ yılları devamında yapqan yaramaylıqlardan arınmağa imkânıñ bar. Rabbiñe qarşı nasıl cinayet yaptıñ, Allahnıñ qulları ögünde nasıl cinayet yaptıñ. Elbette Allahnıñ mahlüqaları ögünde afu istemek kerektir, amma birinciden biz Rabbimizge tövbe yapamız, soñ ise Rabbimiz Onıñ mahlüqlarından afu soramağa yardım ete. Özüñe manaçıqlar qıdırıp bu fırsatnı qaçırmağa mümkünki aceba?!
İnsan dey: «Maña qolay degil». Elbette qolay degil. Sen ise nasıl tüşündiñ? Sen bellediñ Cennet qolaynen qazanılamı? Cennet – bu pek palı mal. Cennet – bu ebediy raatlıq, sen anda ölümden, fuqarelikten, qartlıqtan, yaqınlarıñnen ayırılmaqtan qorqmaycañ, anda qastalıq, azap ve belâlar olmaycaq. Bu şeylerni qolaylıqnen qazanırım dep tüşünesinmi? Peyğamberimiz ﷺ dedi:
«Cennet ağırlıqnen sarılğandır».
Cennet ağırlıqnen sarılğandır. Yoqsa yetiştirerim, dep tüşünesiñmi. Bu sene olmasa keler sene olur. Kelecek sene olmasa, soñra olur. Sen boşuna böyle tüşünesiñ, çünki Peyğamberimiz ﷺ , özleriñizni ölüler sırasında dep tüşüniñiz dedi. Sen bilip olamasıñ, saña 10 Ramazan yada 15 Ramazan nasib olacaq. Belki bu seniñ soñki ramazanıñdır. Belki sende diger fırsat olmaycaq. Yada seniñ işleriñ güzel, seniñ asla günahlarıñ yoq? Yada sen o qadar hayır amel topladıñ, saña endi qorqmamaq mümkün? Saña raatlıqnen amel mekânından esap mekânına ketmege mümkün mi? Belki sen bilmeysiñ, bütün keçmiş ve kelecek günahları afu etilgen, bu günahları afu etilgenine baqmadan bu gecelerni ğayret ile ibadette keçire edi. O öz ibadetini daa güzel yapmaq içün öz izarını qattı bağlay edi, apaylarından uzaqlaşa edi, öz ailesini uyatıp bu gecelerni ibadette keçire edi. Aişe anamız rivayet ete:
«Ramazan aynıñ soñki on geceleri kelgeninde, o gecelerini ibadette keçire edi».
Diger gecelerde ise Peyğamberimiz ﷺ geceniñ bir parçasını yuqlay edi, diger praçasında ise ibadet ete edi.
Onıñ içün hafif olma, aqılsız olma, öz istekleriñniñ, arzularıñnıñ, öz nefsiñniñ qulu olma, çünki bu geceler pek qiymetlidir! Bunı sen añlasañ ediñ!
Тазе тефсирлер