بسم الله الرحمن الرحيم
Latin urufatında oqumaq
Эй Аллахнынъ къуллары, Рамазан якъынлаша! Тезден мектеп ачыладжакъ – сайылы куньлер къалды. Му’мин, о мектеп ачыладжакъ кунюне къадар яшап етеджегине къасевет эте, эйеджанлана. О, мектепке кирип оладжакъмы аджеба? Кирип олса биле, о мектепни онъгъанларны сырасындамы битиреджек яда йыкъылгъанларнымы сырасында?
Эльбетте, мен «Рамазан» адлы мектеп акъкъында айткъанымны анъладынъыз. Бу Къуран ве такъва мектебидир. Бу Юдже Аллахнынъ кенъ рахмети, багъышлав ве джехеннем атешинден къуртулув вакъытыдыр.
Юдже Аллахнынъ изининен, биз тезден бу къийметли ве севимли мусафирны къаршылайджамыз. Ислям уммети, озь къальблерини ачып, бутюн къуванчнен оны къаршылайджакъ. Рамазан айы келишинен, кальблер ачыла ве умютнен тола.
Биз бу, номай темизлеген, бизим къуругъан ве баят рухларымызгъа тёкюледжек ягъмур къайтып кельгенине къуванамыз. Юдже Аллаха таби олмагъа юзь чевирмектен ве къачмакътан сонъ, итаатнен толу оладжакъ вакъыт кельгенине къуванамыз. Иман эткенлернинъ нефслери насыл къуваналар, ынтылалар, бу куньлерни кельмесини авес этелер.
Эй Аллахнынъ къуллары, айтынъыз, мусульманлардан къайсы бири, айларнынъ султаны олгъан бу айнынъ эмиетлерини ве устюнлигини бильмей. Бу айларнынъ энъ гузели – Рамазан айыдыр, бу айда Къуран эндирильген. Ким де ким, бу айда ораза тутса ве гедже намазларыны къылса – онынъ бутюн кечмиш гюнахлары афу этиледжек. Бу айда, бинъ айлардан даа хайырлы олгъан Къадр геджеси бар.
Пейгъамберимиз ﷺ деген:
«Ким де ким, Къадр геджесини Аллахнынъ мукяфатына инанып ве умют этип ибадетте кечирсе, онынъ бутюн кечмиш гюнахлары афу этиледжек».
Аль-Бухари (35), Муслим (760).
Эй Аллахнынъ къуллары, Рамазан айына яшап етмек – бу Юдже Аллах тарафындан буюк бир рахметтир. Билинъиз ки, эгер инсан Рамазан айына яшап ете, ве кереги киби, ихляслы оларакъ ораза тута ве Юдже Аллахкъа ибадет эте, бу Юдже Аллахнынъ тарафындан буюк рахметтир. Бойле инсан озь мукяфатында Аллах ёлунда джан берген, амма бу Рамазан айына яшат етмеге кимсени озип кечеджек.
Тальха ибн ‘Убайдуллахтан (Аллах ондан разы олсун) ривает этиле, бир заман Балий къавмындан Пейгъамберимизге ﷺ эки акъай киши кельди ве бирден Ислямны къабул эттилер. Бириси ибадетте экинджисине бакъкъанда даа гъайретли эди. О чокъ гъайрет корьсеткен сою сеферге кетти ве шехид олып ольди. Экинджиси исе ондан сонъ даа бир сене яшап кечинди. Тальха деди:
«Мен тюшюмде Дженнет къапулары огюнде турып оларны экисини корьдюм. Фелянджы Дженнет къапуларындан чыкъты, ве олардан, сонъ кечинген союна кирмеге изин берди. Сонъ исе о кенеде чыкъты ве Аллах ёлунда шехид оларакъ джан бергенге кирмеге изин берди. Сонъ исе меним яныма кельди ве деди: “Артынъа къайт, сенинъ вакъытынъ даа кельмеди”».
Тальха уянды ве бу тюш акъкъында айретте къалгъан инсанларгъа айтып башлады. Бу хабер Пейгъамберимизге ﷺ барып еткенинен, о ﷺ деди:
«Сизни не айретке къалдыра?»
(Инсанлар) дедилер: «Эй Аллахнынъ эльчиси, о экисинден даа зияде гъайрет корьсеткен эди, сонъ исе шехид оларакъ ольди, экинджиси исе ондан биринджи Дженнетке кирди!»
Аллахнынъ эльчиси ﷺ деди: «Экинджиси ондан сонъ даа бир сене девамына тири къалмадымы аджеба?»
(Инсанлар) дедилер: «Эбет, бу ойле».
Пейгъамберимиз ﷺ деди: «О Рамазангъа раст кельмедими, онда ораза тутмадымы, ве даа йыл девамында намазлар ве седжделер къылмадымы?»
(Инсанлар) дедилер: «Эбет, бу ойле».
Пейгъамберимиз ﷺ деди: «Бу себептен, оларнынъ арасы кок ве ерден даа зиядедир».
Ибн Маджах (3925), Ахмад (1/163). Шейх аль-Албани бу хадиске сахих деди. Бакъ «Сахих аль-Джами’» (1316).
Мына будыр, Рамазан айына яшап етмек ве оны Юдже Аллахкъа ибадетте кечирмек.
Эй Аллахнынъ къуллары, Рамазан айы – келир вакъытыдыр. Бу энъ гузель мусафирдир, хош къокъулы айдыр. Бу хайыр ве берекетнен толгъан вакъыттыр. Онынъ ичюн, эй Аллахнынъ къуллары бу ай кельмесинден эвель, къатты азимкярлыкънен едекленинъиз. Бу айда Юдже Аллахкъа озьлеринъизни яхшы тарафтан корьсетинъиз. Ким де ким гъайрет корьсетсе, о мувафакъиет къазанаджакъ. Гъайрет корьсеткенлерден гъайры бир кимсе мувафакъиет къазанмаз. Билинъиз ки, тембелликте ве гъамсызлыкъта булунгъан кимсени бутюн умютлери бозула, бойле инсан хайырсызлыкъ къазанаджакъ.
Пейгъамберимиз ﷺ деди:
«Рамазан айы келип кечкен, амма онъа багъышланмагъан инсанны башына ашшагъы вазиет кельсин».
Тирмизи (3545), Ахмад (2/254). Шейх аль-Албани бу хадиске сахих деди. Бакъ «Сахих аль-Джами’» (351).
Артыкъ, Рамазан айы кетти, инсан исе Юдже Аллахтан багъышлав алып оламады.
Рамазан айы – амеллерни къабул олмасыны вакъытыдыр. Бу Джехеннемден къуртулув, джёмерт ве котерильме айыдыр. Бу айда арекет япмагъан ве бу айны ред эткен инсанлар не къадар буюк зарар къазанаджакълар. Акъылынъыздами, не деди Пейгъамберимиз ﷺ — о, Юдже Аллахнынъ сёзлерини еткизди:
«Эгер къулум Манъа бир къарышкъа якъынланса, Мен онъа бир тирсекке якъынланаджам, эгер о Манъа къаршы бир тирсекке якъынлашса, Мен онъа бир къолнынъ пармакъ уджундан экинджи колнынъ пармакъ уджу арасына якъынлашаджам, эгер о Манъа адымнен якъынлашса, Мен онъа къаршы чападжам».
Аль-Бухари (7536).
Тезден, Аллахнынъ изининен, бу амеллернинъ ве тёвбелернинъ къабул этильмеси ели уфюреджек. Тезден бу хайыр акъым акъаджакъ, бу къапу ачыладжакъ. Истеген – бу къапугъа кирип оладжакъ.
Тезден, му’минлерге ибадет этмек къолай олмасы ичюн хышымлы джин ве шейтанлар зынджырларгъа багъланаджакълар. Бакъынъыз, Юдже Аллах (Субханаху ва Та’аля) насыл къолайлыкълар насиб этти. Пейгъамберимиз ﷺ деди:
«Рамазаннынъ биринджи геджеси кельгенинен, шейтан ве бойсунмагъан джинлер бугъавларгъа багъланалар, ве Джехеннем къапулары къапала, ве оларнынъ бириси ачылмай, ве Дженнет къапулары ачыла, ве оларнынъ бириси къапалмай, ве деллял хабер эте: “Эй хайыргъа тырышкъан, арекет этип башла! Эй зулюмге тырышкъан фелянджы – вазгеч!” Ве Юдже Аллахта Джехеннем атешинден азат этильгенлер бар, ве бу азат этмек (Рамазаннынъ) эр бир геджесинде оладжакъ».
Ибн Маджах (1642), Тирмизи (682),Насаи (4/126). Шейх аль-Албани бу хадиске сахих деди. Бакъ «Сахих аль-Джами’» (759).
Онынъ ичюн, оразалы кимсе гюнахлардан, онынъ амеллерини бозаджакъ шейлерден узакълашмакъ керек. Бакъынъыз, белли имам Раджаб (Аллахнынъ рахметинде олсун) не деди:
«Биль ки, эр заман элял олгъан, амма Рамазан айында ясакъ этильген (ашамакъ, ичмек, апайынънен олмакъ) амеллер себебинден Юдже Аллахкъа якъынлашмакъ, тек о заман оладжакъ, не заман инсан эр вакъыт (эр айларда) харам олгъан шейлерни ред этеджектир».
Амма бу: ялан, адалетсизлик, джангъа, намускъа ве малгъа къаст этмек.
Рамазан – бу айларнынъ энъ гузелидир, онынъ ичюн, эй Аллахнынъ къулу, бу айнынъ мубареклигини бозма. Эй Аллахнынъ къулу, бу айнынъ намусыны бозма! Эй Аллахнынъ къулу, бу айнынъ къийметини бозма!
Пейгъамберимиз ﷺ деди (бу сёзлерни акъылынъызда тутынъыз!):
«Эгер ораза вакъытында инсан ялан айтмакъны ве яланнен давранмакъны токътатмаса, Юдже Аллах (Субханаху ва Та’аля) онынъ аш ве сувдан ред этмесинде мухтадж дегильдир».
Аль-Бухари (1903).
Джабир ибн Абдуллах (Аллах ондан разы олсун), Пейгъамберимизни ﷺ сахабеси, деди:
«Сен ораза туткъан вакъытынъда, сенинъ эшитювинъ, сенинъ козьлеринъ ве тилинъде (ялан ве гюнах айтмакътан) ораза тутсын. Санъа бойсунгъанны ынджытма ве онъа зарар кетирме. Сенинъ табиатынъда раатлыкъ олсун. Ораза туткъан кунюнъни ораза тутмагъан куньге чевирме».
Эй Аллахнынъ къулу, ораза туткъан куньлеринъ, ораза тутмагъан къуньлеринъе бенземесин. Ораза туткъанны мукяфатыны алсакъ – акъикъатен, бу мукяфатны тасвир этмеге чаре ёкъ. Не ичюн? Чюнки, Юдже Аллах (Субханаху ва Та’аля) ораза ичюн насыл мукяфат оладжагъыны айтмады.
Юдже Аллах (Субханаху ва Та’аля) Озь Пейгъамберинен ﷺ хабер этти, О джёмерлернинъ энъ джёмертидир. О, ораза туткъан кимсени мукяфатыны бермеге вазифеленди. Онъа мукяфат бермекнен – биз насыл олгъаныны бильмеймиз. Пейгъамберимиз ﷺ деди:
«Улу ве Къудрет саиби Аллах деди: “Адем огълунынъ эр бир амели озю ичюн япыла, оразадан гъайры, акъикъатен, о Меним ичюн, ве о ичюн Мен береджем”».
Аль-Бухари (1904).
Кенеде Пейгъамберимиз ﷺ деди:
«Ораза къалкъандыр, ве о куньлерде ораза туткъан кимселер айып шейлерден узакълашсын ве сесини юксельтмесин. Эгер исе оны бир кимсе сёгюп башласа яда оннен тартышмагъа истесе, бойле инсангъа десин ки: “Акъикъатен, мен оразалым!” Мухаммеднынъ руху олгъан къолнен емин этем, Юдже Аллах ичюн ораза туткъан кимсенинъ агъзындан кельген къокъу, мисктен даа хоштур, ораза туткъан кимсе эки къуванч дуя: о ифтар япкъанында къувана, ве (ораза туткъаны ичюн) озь Раббисинен корюшкенде къуванаджакъ».
Аль-Бухари (1904), (7492); Муслим (1151).
Ве бир хадисте ривает этиле, инсаннынъ эр бир амели ичюн ондан едиюз къат ве даа зияде мукяфат азырлангъан. Оразадан гъайры. Юдже Аллах (Субханаху ва Та’аля) дей: «О (ораза) – Меним ичюн. Ве онынъ мукяфатыны Мен айрыджа береджем».
Бакъынъыз, не дей Юдже Аллах (Субханаху ва Та’аля):
«О (ораза туткъан кимсе) Меним ичюн озь ашындан, ичмектен ве озь истеклерини ерине кетирмектен озюни тута».
Ве хадисте ривает этиле:
«Келеджек Рамазан айында тутыладжакъ ораза, кечкен оразанен бу ораза арасында олгъан бутюн гюнахларны одей, тек бу гюнахлар арасында балабан гюнахлар олмайджакъ».
Муслим (233).
Махшер куню исе ораза туткъан кимселерни буюк мукяфат беклей! Ойле мукяфатки, Дженнетте «Раййан» адлы айры къапулар бар.
Пейгъамберимиз ﷺ деди:
«Акъикъатен, Дженнетте «Ар — Раййан» адлы къапулар бар, Махшер куню о къапулардан тек ораза туткъан кимселер кирип оладжакъ, ве олардан гъайры бу къапулардан бир кимсе кирип оламайджакъ. Айтыладжакъ ки: “Ораза туткъанлар къана”, — олар огге чыкъаджакълар, олардан гъайры бу къапулардан бир кимсе кирип оламайджакъ. Не заман олар кирген сонъ, бу къапулар къапаладжакъ, ве башкъа бир кимсе о къапулардан кирип оламайджакъ».
Аль-Бухари (1896), Муслим (1152).
Юдже Аллахтан къоркъунъыз! Ихляслы ниетке талпынынъыз. Бу айны гъайретнен ибадетте кечирмеге ве Юдже Рабинъизге къуллукъ этмеге азимкярлыкъ олсун.
بسم الله الرحمن الرحيم
Ramazan ayına tilek
Ey Allahnıñ qulları, Ramazan yaqınlaşa! Tezden mektep açılacaq – sayılı künler qaldı. Mu’min, o mektep açılacaq kününe qadar yaşap yetecegine qasevet ete, eyyecanlana. O, mektepke kirip olacaqmı aceba? Kirip olsa bile, o mektepni oñğanlarnı sırasındamı bitirecek yada yıqılğanlarnımı sırasında?
Elbette, men «Ramazan» adlı mektep aqqında aytqanımnı añladıñız. Bu Quran ve taqva mektebidir. Bu Yüce Allahnıñ keñ rahmeti, bağışlav ve cehennem ateşinden qurtuluv vaqıtıdır.
Yüce Allahnıñ izininen, biz tezden bu qiymetli ve sevimli musafirnı qarşılaycamız. İslâm ümmeti, öz qalblerini açıp, bütün quvançnen onı qarşılaycaq. Ramazan ayı kelişinen, kalbler açıla ve ümütnen tola.
Biz bu, nomay temizlegen, bizim quruğan ve bayat ruhlarımızğa tökülecek yağmur qaytıp kelgenine quvanamız. Yüce Allaha tabi olmağa yüz çevirmekten ve qaçmaqtan soñ, itaatnen tolu olacaq vaqıt kelgenine quvanamız. İman etkenlerniñ nefsleri nasıl quvanalar, ıntılalar, bu künlerni kelmesini aves eteler.
Ey Allahnıñ qulları, aytıñız, musulmanlardan qaysı biri, aylarnıñ sultanı olğan bu aynıñ emiyetlerini ve üstünligini bilmey. Bu aylarnıñ eñ güzeli – Ramazan ayıdır, bu ayda Quran endirilgen. Kim de kim, bu ayda oraza tutsa ve gece namazlarını qılsa – onıñ bütün keçmiş günahları afu etilecek. Bu ayda, biñ aylardan daa hayırlı olğan Qadr gecesi bar.
Peyğamberimiz ﷺ degen:
«Kim de kim, Qadr gecesini Allahnıñ mukâfatına inanıp ve ümüt etip ibadette keçirse, onıñ bütün keçmiş günahları afu etilecek».
Al-Buhari (35), Müslim (760).
Ey Allahnıñ qulları, Ramazan ayına yaşap yetmek – bu Yüce Allah tarafından büyük bir rahmettir. Biliñiz ki, eger insan Ramazan ayına yaşap yete, ve keregi kibi, ihlâslı olaraq oraza tuta ve Yüce Allahqa ibadet ete, bu Yüce Allahnıñ tarafından büyük rahmettir. Böyle insan öz mukâfatında Allah yolunda can bergen, amma bu Ramazan ayına yaşat yetmege kimseni özip keçecek.
Talha ibn ‘Ubaydullahtan (Allah ondan razı olsun) rivayet etile, bir zaman Baliy qavmından Peyğamberimizge ﷺ eki aqay kişi keldi ve birden İslâmnı qabul ettiler. Birisi ibadette ekincisine baqqanda daa ğayretli edi. O çoq ğayret körsetken soyu seferge ketti ve şehid olıp öldi. Ekincisi ise ondan soñ daa bir sene yaşap keçindi. Talha dedi:
«Men tüşümde Cennet qapuları ögünde turıp olarnı ekisini kördüm. Felâncı Cennet qapularından çıqtı, ve olardan, soñ keçingen soyuna kirmege izin berdi. Soñ ise o kenede çıqtı ve Allah yolunda şehid olaraq can bergenge kirmege izin berdi. Soñ ise menim yanıma keldi ve dedi: “Artıña qayt, seniñ vaqıtıñ daa kelmedi”».
Talha uyandı ve bu tüş aqqında ayrette qalğan insanlarğa aytıp başladı. Bu haber Peyğamberimizge ﷺ barıp yetkeninen, o ﷺ dedi:
«Sizni ne ayretke qaldıra?»
(İnsanlar) dediler: «Ey Allahnıñ elçisi, o ekisinden daa ziyade ğayret körsetken edi, soñ ise şehid olaraq öldi, ekincisi ise ondan birinci Cennetke kirdi!»
Allahnıñ elçisi ﷺ dedi: «Ekincisi ondan soñ daa bir sene devamına tiri qalmadımı aceba?»
(İnsanlar) dediler: «Ebet, bu öyle».
Peyğamberimiz ﷺ dedi: «O Ramazanğa rast kelmedimi, onda oraza tutmadımı, ve daa yıl devamında namazlar ve secdeler qılmadımı?»
(İnsanlar) dediler: «Ebet, bu öyle».
Peyğamberimiz ﷺ dedi: «Bu sebepten, olarnıñ arası kök ve yerden daa ziyadedir».
İbn Macah (3925), Ahmad (1/163). Şeyh al-Albani bu hadiske sahih dedi. Baq «Sahih al-Cami’» (1316).
Mına budır, Ramazan ayına yaşap yetmek ve onı Yüce Allahqa ibadette keçirmek.
Ey Allahnıñ qulları, Ramazan ayı – kelir vaqıtıdır. Bu eñ güzel musafirdir, hoş qoqulı aydır. Bu hayır ve bereketnen tolğan vaqıttır. Onıñ içün, ey Allahnıñ qulları bu ay kelmesinden evel, qattı azimkârlıqnen yedekleniñiz. Bu ayda Yüce Allahqa özleriñizni yahşı taraftan körsetiñiz. Kim de kim ğayret körsetse, o muvafaqiyet qazanacaq. Ğayret körsetkenlerden ğayrı bir kimse muvafaqiyet qazanmaz. Biliñiz ki, tembellikte ve ğamsızlıqta bulunğan kimseni bütün ümütleri bozula, böyle insan hayırsızlıq qazanacaq.
Peyğamberimiz ﷺ dedi:
«Ramazan ayı kelip keçken, amma oña bağışlanmağan insannı başına aşşağı vaziyet kelsin».
Tirmizi (3545), Ahmad (2/254). Şeyh al-Albani bu hadiske sahih dedi. Baq «Sahih al-Cami’» (351).
Artıq, Ramazan ayı ketti, insan ise Yüce Allahtan bağışlav alıp olamadı.
Ramazan ayı – amellerni qabul olmasını vaqıtıdır. Bu Cehennemden qurtuluv, cömert ve köterilme ayıdır. Bu ayda areket yapmağan ve bu aynı red etken insanlar ne qadar büyük zarar qazanacaqlar. Aqılıñızdami, ne dedi Peyğamberimiz ﷺ — o, Yüce Allahnıñ sözlerini yetkizdi:
«Eger qulum Maña bir qarışqa yaqınlansa, Men oña bir tirsekke yaqınlanacam, eger o Maña qarşı bir tirsekke yaqınlaşsa, Men oña bir qolnıñ parmaq ucundan ekinci kolnıñ parmaq ucu arasına yaqınlaşacam, eger o Maña adımnen yaqınlaşsa, Men oña qarşı çapacam».
Al-Buhari (7536).
Tezden, Allahnıñ izininen, bu amellerniñ ve tövbelerniñ qabul etilmesi yeli üfürecek. Tezden bu hayır aqım aqacaq, bu qapu açılacaq. İstegen – bu qapuğa kirip olacaq.
Tezden, mu’minlerge ibadet etmek qolay olması içün hışımlı cin ve şeytanlar zıncırlarğa bağlanacaqlar. Baqıñız, Yüce Allah (Subhanahu va Ta’alâ) nasıl qolaylıqlar nasib etti. Peyğamberimiz ﷺ dedi:
«Ramazannıñ birinci gecesi kelgeninen, şeytan ve boysunmağan cinler buğavlarğa bağlanalar, ve Cehennem qapuları qapala, ve olarnıñ birisi açılmay, ve Cennet qapuları açıla, ve olarnıñ birisi qapalmay, ve dellâl haber ete: “Ey hayırğa tırışqan, areket etip başla! Ey zulümge tırışqan felâncı – vazgeç!” Ve Yüce Allahta Cehennem ateşinden azat etilgenler bar, ve bu azat etmek (Ramazannıñ) er bir gecesinde olacaq».
İbn Macah (1642), Tirmizi (682),Nasai (4/126). Şeyh al-Albani bu hadiske sahih dedi. Baq «Sahih al-Cami’» (759).
Onıñ içün, orazalı kimse günahlardan, onıñ amellerini bozacaq şeylerden uzaqlaşmaq kerek. Baqıñız, belli imam Racab (Allahnıñ rahmetinde olsun) ne dedi:
«Bil ki, er zaman elâl olğan, amma Ramazan ayında yasaq etilgen (aşamaq, içmek, apayıñnen olmaq) ameller sebebinden Yüce Allahqa yaqınlaşmaq, tek o zaman olacaq, ne zaman insan er vaqıt (er aylarda) haram olğan şeylerni red etecektir».
Amma bu: yalan, adaletsizlik, canğa, namusqa ve malğa qast etmek.
Ramazan – bu aylarnıñ eñ güzelidir, onıñ içün, ey Allahnıñ qulu, bu aynıñ mubarekligini bozma. Ey Allahnıñ qulu, bu aynıñ namusını bozma! Ey Allahnıñ qulu, bu aynıñ qiymetini bozma!
Peyğamberimiz ﷺ dedi (bu sözlerni aqılıñızda tutıñız!):
«Eger oraza vaqıtında insan yalan aytmaqnı ve yalannen davranmaqnı toqtatmasa, Yüce Allah (Subhanahu va Ta’alâ) onıñ aş ve suvdan red etmesinde muhtac degildir».
Al-Buhari (1903).
Cabir ibn Abdullah (Allah ondan razı olsun), Peyğamberimizni ﷺ sahabesi, dedi:
«Sen oraza tutqan vaqıtıñda, seniñ eşitüviñ, seniñ közleriñ ve tiliñde (yalan ve günah aytmaqtan) oraza tutsın. Saña boysunğannı ıncıtma ve oña zarar ketirme. Seniñ tabiatıñda raatlıq olsun. Oraza tutqan künüñni oraza tutmağan künge çevirme».
Ey Allahnıñ qulu, oraza tutqan künleriñ, oraza tutmağan qunleriñe benzemesin. Oraza tutqannı mukâfatını alsaq – aqiqaten, bu mukâfatnı tasvir etmege çare yoq. Ne içün? Çünki, Yüce Allah (Subhanahu va Ta’alâ) oraza içün nasıl mukâfat olacağını aytmadı.
Yüce Allah (Subhanahu va Ta’alâ) Öz Peyğamberinen ﷺ haber etti, O cömerlerniñ eñ cömertidir. O, oraza tutqan kimseni mukâfatını bermege vazifelendi. Oña mukâfat bermeknen – biz nasıl olğanını bilmeymiz. Peyğamberimiz ﷺ dedi:
«Ulu ve Qudret saibi Allah dedi: “Adem oğlunıñ er bir ameli özü içün yapıla, orazadan ğayrı, aqiqaten, o Menim içün, ve o içün Men berecem”».
Al-Buhari (1904).
Kenede Peyğamberimiz ﷺ dedi:
«Oraza qalqandır, ve o künlerde oraza tutqan kimseler ayıp şeylerden uzaqlaşsın ve sesini yükseltmesin. Eger ise onı bir kimse sögüp başlasa yada onnen tartışmağa istese, böyle insanğa desin ki: “Aqiqaten, men orazalım!” Muhammednıñ ruhu olğan qolnen yemin etem, Yüce Allah içün oraza tutqan kimseniñ ağzından kelgen qoqu, miskten daa hoştur, oraza tutqan kimse eki quvanç duya: o iftar yapqanında quvana, ve (oraza tutqanı içün) öz Rabbisinen körüşkende quvanacaq».
Al-Buhari (1904), (7492); Müslim (1151).
Ve bir hadiste rivayet etile, insannıñ er bir ameli içün ondan yediyuz qat ve daa ziyade mukâfat azırlanğan. Orazadan ğayrı. Yüce Allah (Subhanahu va Ta’alâ) dey: «O (oraza) – Menim içün. Ve onıñ mukâfatını Men ayrıca berecem».
Baqıñız, ne dey Yüce Allah (Subhanahu va Ta’alâ):
«O (oraza tutqan kimse) Menim içün öz aşından, içmekten ve öz isteklerini yerine ketirmekten özüni tuta».
Ve hadiste rivayet etile:
«Kelecek Ramazan ayında tutılacaq oraza, keçken orazanen bu oraza arasında olğan bütün günahlarnı ödey, tek bu günahlar arasında balaban günahlar olmaycaq».
Müslim (233).
Mahşer künü ise oraza tutqan kimselerni büyük mukâfat bekley! Öyle mukâfatki, Cennette «Rayyan» adlı ayrı qapular bar.
Peyğamberimiz ﷺ dedi:
«Aqiqaten, Cennette «Ar — Rayyan» adlı qapular bar, Mahşer künü o qapulardan tek oraza tutqan kimseler kirip olacaq, ve olardan ğayrı bu qapulardan bir kimse kirip olamaycaq. Aytılacaq ki: “Oraza tutqanlar qana”, — olar ögge çıqacaqlar, olardan ğayrı bu qapulardan bir kimse kirip olamaycaq. Ne zaman olar kirgen soñ, bu qapular qapalacaq, ve başqa bir kimse o qapulardan kirip olamaycaq».
Al-Buhari (1896), Müslim (1152).
Yüce Allahtan qorquñız! İhlâslı niyetke talpınıñız. Bu aynı ğayretnen ibadette keçirmege ve Yüce Rabiñizge qulluq etmege azimkârlıq olsun.
Тазе тефсирлер